我點睇偷拍

記得兩個禮拜前在報攤上初次見到阿嬌的更衣照，真係有D衝動想買。但自己係孤寒鬼算死草一名，由於從來都唔覺得呢D刊物有價值，結果都係冇將嗰十幾蚊進貢俾「便利」，估唔到第二日已經賣斷市，仲帶嚟持續兩個禮拜嘅軒然大波。社會上聲討的聲討，捍衞採訪自由的繼續捍衞。萬事有因，我只對事情的前因後果有興趣。

據我多年來在報攤只看不買的經驗，今日嘅「便利」型雜誌有兩個共通點。一係「淫」，走光、凸點、現形，幾乎係每期嘅必要元素。二係「窺」，封面張相即使唔係偷拍，就係專登整到好粗糙扮到好似偷拍咁。

十幾廿年前，呢D元素都只係零星咁出現喺印刷媒體上，報紙雜誌都係以賣新聞為主。不過，「淫」同「窺」嘅需求其實一直存在，因為呢D都係人性。只不過當時社會較保守，這些題材都不宜宣之於口。例如喺一份厚厚嘅報紙上，風月版只佔兩版，要睇嘅話都係喺厠所到睇。蛇貓狗雖然必然出現在各大報攤上，但卻好少見到有人拎住招搖過市。當時報業仲係賣家市場，報紙的内容、排版以致售價都係操縱喺報社手上。記者依然係一個好神聖嘅行業，相信大家唔會唔記得「無冕天使」呢個雅號。

九十年代肥佬黎掘起，以一人之力改變了報業嘅生態。佢就係睇準人性，兼且夠膽挑戰社會嘅道德觀，迎合讀者嘅内心需要。佢嘅壹周刊同蘋果日報迅速獲得讀者嘅受落，更帶起一輪「蘋果化」嘅熱潮。肥佬黎不愧為商業奇才，佢最成功之處就係令「淫」同「窺」呢D人性内心嘅慾望喺佢D報刊入面獲得逐步嘅解放。而且又分析佢哋獨立上市，潮流創出後，漸漸一本又一本嘅「便利」就咁面世嘞。「淫」同「窺」喺香港嘅報業所佔嘅市場份額得以壯大。

踏入21世紀，好多人話我哋進入咗資訊爆炸年代，獲得資訊嘅成本幾乎係零。讀者再冇需要攞6蚊出嚟買一D可以喺網上得到嘅資訊，而且免費報紙又垂手可得，報業開始變成買家市場。整個傳媒行業唯有更著重於滿足讀者嘅其他需要，例如新聞嘅老作程度越來越重、財經專家或賭波專家嘅口水專欄越來越多。傳統媒體要生存，只有奇招百出。

市場發展到今時今日，「便利」呢類型雜誌多多少少已變成一種commodity，即係本本都咁上下，競爭異常激烈，已經到咗今期冇料就冇錢賺嘅地步。所以要賺多D錢，就要突圍而出，靠獨家猛料同驚世駭俗嘅封面。喺未有相應法例出台或大眾口味仲未改變前，今時今日嘅局面似乎唔會改變。