東遊記(四)-指定動作

到東京的指定動作是甚麼？行街？！買嘢？！都啱！

還有到迪士尼樂園。

咁去迪士尼嘅指定動作又係咩嘢呢？1. 企定定--影相，仲有係同嗰d永遠都好難埋身嘅會行會走會整蠱你嘅公仔影相。2. 都係企定定--排隊，仲要你喺烈日當空之下等90分鐘，就係為咗玩5分鐘嗰隻。點解大家願意俾5500円去做呢d嘢呢？我諗答案係1. 相片係重要嘅「到此一遊」證明；2. 大拿拿俾咗5500円，入到去，唔排隊仲有咩嘢好做？

對於以上嘅指定動作：第1項，散戶丙陪散太癲咗一陣，有相為證；第2項，我哋都冇做，因為成本太高，我哋專揀d只需等5分鐘冇人吼嘅劇場睇，有冷氣歎，又有音樂聽，不亦樂乎。

我一直都唔明點解迪士尼會吸引到咁多人去貼錢買難受，就好似股市咁，大部分人明知多數會輸錢，但仲係鍾個頭埋去。計算得失，兩種行為都難於解釋。但如果換個角度睇，炒股票嘅人某程度上係喺度享受梗賭博嘅刺激。如果大家去東京而冇去迪士尼，就好似奧運體操選手喺木馬上冇做湯馬斯盤旋一樣，當人家問起「有冇去迪士尼呀？好唔好玩呀？」，都唔知點交代好。

忽然想起歐洲人對巴黎迪士尼說不的那份冷淡和高傲，或許這是法蘭西文化有無盡吸引力之故。


在途經世界市集準備離開迪士尼的時候，遇上這位敬業樂業的琴師，讓我企定定享受了超值的10分鐘。